అమెరికా వైమానిక దాడులపై ఇరాన్ సీరియస్: ప్రతీకారం తీర్చుకుంటామని వార్నింగ్

హర్మూజ్ జలసంధి సమీపంలోని ఇరాన్ క్షిపణి లాంచ్ సైట్లు, సాయుధ బోట్లను లక్ష్యంగా చేసుకుని అమెరికా సైన్యం జరిపిన దాడులపై ఇరాన్ ఇస్లామిక్ రివల్యూషనరీ గార్డ్ కార్ప్స్ (ఐఆర్‌జీసీ) తీవ్రంగా స్పందించింది. అమెరికా చర్యకు కచ్చితంగా ప్రతీకారం తీర్చుకుంటామని హెచ్చరించింది. ఈ మేరకు ఐఆర్‌జీసీ అధికారిక వార్తా సంస్థ 'సెపా న్యూస్' ఒక ప్రకటన విడుదల చేసింది. వ్యూహాత్మకంగా ఎంతో కీలకమైన హర్మూజ్ జలసంధిపై తమ నావికాదళం పూర్తిస్థాయిలో నిఘా ఉంచిందని, ఎలాంటి దురాక్రమణ చర్యలకైనా పాల్పడితే తీవ్రమైన రీతిలో తిప్పికొడతామని స్పష్టం చేసింది.

మరోవైపు, ఇరాన్ దళాల నుంచి ముప్పు పొంచి ఉన్నందున, తమ సైనికుల రక్షణ కోసమే దక్షిణ ఇరాన్‌లోని క్షిపణి స్థావరాలు, మైన్లు అమర్చేందుకు ప్రయత్నిస్తున్న పడవలను లక్ష్యంగా చేసుకుని ఈ ఆత్మరక్షణ దాడులు నిర్వహించినట్లు అమెరికా సెంట్రల్ కమాండ్ (సెంట్‌కామ్) ప్రతినిధి టిమ్ హాకిన్స్ ఒక ప్రకటనలో వెల్లడించారు. ప్రస్తుతం అమల్లో ఉన్న తాత్కాలిక సంధి నిబంధనలను పాటిస్తూనే, తమ దళాల రక్షణ కోసం అమెరికా సైన్యం ఈ చర్యలు తీసుకుందని ఆయన పేర్కొన్నారు.

అమెరికా ఇరాన్ రేవులపై నావికా దిగ్బంధాన్ని అమలు చేస్తున్నప్పటికీ, గల్ఫ్ షిప్పింగ్‌పై తామే పట్టు సాధించామని ఇరాన్ ప్రకటించింది. గత 24 గంటల్లో తమ సమన్వయం, భద్రతా రక్షణలోనే 25 చమురు ట్యాంకర్లు, కంటైనర్ నౌకలు సురక్షితంగా హర్మూజ్ జలసంధిని దాటాయని ఐఆర్‌జీసీ తెలిపింది. కాగా, ఇరాన్‌పై అమెరికా విధించిన నావికా దిగ్బంధం వల్ల గత వారంలోనే దాదాపు 100 నౌకల మార్గాన్ని మళ్లించామని, నాలుగింటిని నిలిపివేశామని అమెరికా సైన్యం పేర్కొంది. ఫిబ్రవరి 28 నుంచి ఇజ్రాయెల్, అమెరికాలతో అనుబంధం ఉన్న నౌకల రాకపోకలను ఇరాన్ నిషేధించడంతో ఈ ప్రాంతంలో ఉద్రిక్తతలు మరింత పెరిగాయి. తాజా దాడుల కారణంగా ఏప్రిల్ 8 నుంచి అమల్లోకి వచ్చిన బలహీనమైన సీజ్‌ఫైర్‌కు విఘాతం కలిగే ప్రమాదం ఏర్పడింది. దీనివల్ల అంతర్జాతీయ ఇంధన రవాణా నిలిచిపోయి ప్రపంచ ఆర్థిక వ్యవస్థపై ప్రభావం పడే అవకాశం ఉందని నిపుణులు ఆందోళన వ్యక్తం చేస్తున్నారు.